藝術展連環三擊慶回歸

【明報專訊】嚟緊呢個禮拜有3個藝術展覽舉行，展出不同類型嘅藝術品同畫作，係慶祝香港特區成立20周年重點活動。其中禮拜三（24號）起沙田香港文化博物館將舉行「敦煌韻致——饒宗頤教授之敦煌學術藝術展」，展出多幅饒宗頤嘅著作同書畫作品，畀觀眾認識饒老喺敦煌學方面嘅成就，展覽期至9月18號。


饒宗頤敦煌展沙田舉行

同樣喺周三開幕嘅「慶祝香港回歸祖國二十周年展覽暨中國書畫名家藝術展」將會喺中央圖書館地下展覽館舉行，展出張大千、黃永玉、饒宗頤同金庸等內地及香港近代書畫名家嘅作品。展覽免費入場，展期至本月29號。


城市大學劉鳴煒學術樓18樓城大展覽館則喺5月25號至7月23號舉行《在巴黎屋頂的邊緣》展覽，展品包括三維建築模型、法國油畫、照片同多媒體裝置等，務求令觀眾從不同角度感受巴黎，了解佢點樣由一個中世紀城鎮蛻變為「花都」。