陳岳鵬提早離任 赴美深造 稱無關新政府人事安排

【明報專訊】政制及內地事務局長譚志源早前已經表明任滿後將離開政府，該局副局長陳岳鵬（Ronald）噚日亦透露已遞交辭職信，將會喺6月中離任，去美國哈佛大學甘迺迪學院修讀公共行政碩士課程。Ronald強調去年中已為進修計劃準備，離任同新一屆政府人事安排無關。
早年曾拒林鄭邀過檔
被問到候任特首林鄭月娥有無邀請佢留任，Ronald話唔評論任何人事問題。據Emily所知，林太做政務司長時處理政改，同Ronald 有緊密接觸，當年林太更曾挖角邀請佢過檔做其政助，但Ronald無走到，政改後幾個月Ronald 就由政制局政助升做副局長喇。
現屆政府嘅任期於下月30日結束，但由於課程喺6月26日開學，所以Ronald要提早離開政府，佢話6月16日會係「last day」。Ronald話課程為期11個月，有同局長商量過，認為提早兩星期離開對局方工作無太大影響，亦將有關情况向局長同特首辦方面交代。
Ronald噚日話，長遠而言自己對社會服務有興趣同希望參與更多，不排除日後重返政府工作。佢計劃完成課程後，會喺私人機構工作幾年，唔排除加入商界或其他非政府機構，「想學啲過去幾年都未做過嘅事」。
葉太祝昔日「愛將」鵬程萬里
Ronald昔日係新民黨主席葉劉淑儀嘅「愛將」，葉太祝Ronald鵬程萬里，話對方由政助升到副局「太急」，如要再升任局長係有難度，因為基礎唔夠，所以認為Ronald離開政府到美國深造係好事。