內地「老鼠倉」 基金經理賺千萬罰3萬

【明報專訊】熟悉股票市場嘅讀者應該對「老鼠倉」一詞唔陌生，意思係形容啲基金經理先用自己錢買入股票，再用基金裏面嘅客戶資金拉高相應股票價格，升到咁上下再沽出自己事先買入嘅股票獲利，雖然話係犯法，不過都要睇吓你身處咩地方，喺香港就要小心啲，但喺內地隨時可能發達。


內地就有一家資產管理公司嘅私募法定代表人A串通客戶B，用B嘅資金喺旗下管理嘅私募產品出手前後買入16隻上海A股，包括東阿阿膠、恒逸石化、蘇寧環球、南嶺民爆等，再適時沽出獲利948.02萬元人民幣，兩個人慢慢分。最後東窗事發，畀福建證監局揭發，呢啲損害客戶利益嘅事理應嚴懲，加重罰款啦！證監局罰係有罰，不過係罰款3萬蚊。有無搞錯？無呀，佢哋真係賺近千萬，罰款3萬，計落每個人都係吐番1.5萬出嚟，仲袋成946萬。咁筍嘅刁，邊度搵呀？


[小琴密語]