日內瓦發明展 港51發明獲獎

【明報專訊】日內瓦國際發明展係全球最大規模嘅發明展之一，特首梁振英（CY）同創新及科技局長楊偉雄噚日就出席得獎者嘅慶祝酒會，CY致辭話，今屆係香港參展以來嘅最佳成績，有51個發明獲獎，包括6項特別大獎、34面金牌、15面銀牌同2面銅牌，獲獎團隊來自科學園嘅科技公司、浸會大學同理工大學嘅團隊等，涉及範疇廣泛，包括醫療科技、機械工程、食品急凍系統同運動裝備。
Emily留意到，近排得獎團隊所屬嘅機構陸續公布喜訊，好似理大上個月公布，同時為疤痕加壓同保濕嘅「平疤貼」獲頒特別大獎同評判特別嘉許金獎；科學園公司嘅「眼藥導入儀」用無創方式送藥物去到眼球內，幫助眼病患者，獲頒兩項特別大獎同評審團特別嘉許金獎。