禮賓府修葺 5年花3000萬 財爺官邸79萬最慳家

【明報專訊】財政司長陳茂波今年初上任無耐，打算修葺司長官邸，要花費花83萬元，引起社會爭議。建築署近日回覆立法會議員查詢，披露由2012/13起嘅5個財政年度（截至今年2月），特首官邸、即係禮賓府共花2977萬元修葺，開支遠超三司官邸。政務司長、財政司長同律政司長官邸，就分別花咗375萬、79萬同190萬元，但財政司長官邸嘅修葺開支數字，未有包括文首提到嘅83萬元。


建築署：古蹟要保養

而修葺費嘅主要用途，禮賓府全面更換屋頂支架同瓦片、翻新泳池同其他改善工程，政務司長同律政司長官邸都係做內外牆粉飾同室內裝修為主，至於財政司長官邸就修復建築物同地台耗損、更換破損地氈，同埋修復外牆油漆等。


署方解釋，禮賓府有超過160年歷史，屬於法定古蹟，而政務司長同財政司長官邸亦屬二級歷史建築物，分別有66年和82年歷史，為咗妥善保存歷史建築物，有需要做適切保養。署方特別補充，由於財政司長官邸對上一次大型保養已經係2007年嘅事，唔少建築同設施已經用耐咗有破損，所以前財爺年初搬走之後，相關部門就建議做修葺。