胡官開個人fb 萬人follow

【明報專訊】特首選戰落幕，敗選嘅胡國興同曾俊華噚日雖然無公開謝票活動，但就各有新動態。已經71歲嘅胡官選完好似意猶未盡，事隔一日已經好快手整咗個個人facebook帳戶，希望同大家繼續交流，分享生活點滴同趣事。


胡官噚日喺競選工程嘅facebook上載咗條片，感謝唔同人對佢嘅支持，又話家已清理緊競選辦，嚟緊會轉移陣地去自己嘅個人fb，希望大家可以follow佢。唔好睇小胡官嘅fans呀，好快已爆好友上限，follow嘅網民都有逾萬。


曾俊華卡片謝選委 唔提名都有

曾俊華嘅競選工程一向出色，雖然選舉告一段落，但佢有始有終，噚日向選委寄上親筆簽名致謝卡。薯片叔叔無分陣營，無提名畀佢嘅建制選委好似梁美芬等都有收到，做到一視同仁。曾俊華前晚又喺facebook加推圖輯，吸引唔少人憑相回味選舉，大部分相可能熟口熟面，唯獨一張叫Emily注目，就係曾俊華赤裸上身做拔罐！曾營話薯片喺選舉期間好攰，最後幾星期重感冒，體力透支，其間佢哋見中醫界選委時，對方建議佢做拔罐，仲推介咗師傅畀佢