IT界陳澤滔轉投白票捱轟 想向傘運者講「無忘記過你們」

【明報專訊】特首選舉結果塵埃落定，少數泛民選委選擇投白票，其中資訊科技界選委陳澤滔，本來打算含淚投票畀曾俊華，但喺投票前夕決定改投白票，因而被唔少網民批評。阿滔帶點激動回應，話投白票係要向參與過雨傘革命、付出過嘅年輕人講一聲，「無忘記過你們」。
曾話重新定義龍和道改投票決定
曾俊華喺上周造勢大會上話，要重新定義龍和道，呢番言論令唔少曾經參與佔中，特別係喺龍和道抗爭嘅年輕人非常不滿。阿滔話，曾俊華此番言論係令佢改變投票決定嘅「最後一根稻草」。佢又話投白票係想畀番個希望呢班被忽視嘅抗爭者。至於有無後悔過參選選委，阿滔話「好難答」，又話走入選委制度內，先知道當中嘅掙扎。
除咗阿滔，投白票嘅仲有社福界立法會議員邵家臻、香港眾志議員羅冠聰同朱凱廸議員等，雖然受到批評，但佢哋強調係堅持自己嘅政治原則。