大學生搵贊助 王迪詩：曾收過萬元禮物清單

【明報專訊】樹仁大學早前有學生要求小食店贊助食物後「放飛機」，其實Emily間唔中都聽到大學生搵贊助出事，作家王迪詩（Daisy）前日就喺facebook講，有大學生搵佢贊助、幫手發生嘅奇聞，話「大開眼界」。


送書被拒 「其他禮物仲適合」

Daisy喺佢嘅facebook專頁話，成日收到大學生請佢去大學嘅High Table Dinner（高桌晚宴），有次有事去唔到，就提出不如送啲佢寫嘅書表達吓心意，點知同學仔話經商議，覺得佢贊助其他禮物仲適合，就電郵咗張禮物清單連價錢畀佢，名副其實係「等住我畀錢」。


清單列雪櫃電視迪士尼年票

至於名單禮物都好精彩，包括單門環保雪櫃、液晶電視電視機、平板電腦、迪士尼樂園年票等，共12樣貨，總值過萬，Daisy用「大開眼界」嚟形容，仲話同學仔喺電郵話會提吓佢本書，難怪Daisy話「幫我宣傳，我感激不盡」。


Daisy又話，有次收到醫科生邀請佢出席High Table Dinner，嗰位同學星期一晚send facebook私信畀佢，佢就星期三下晝覆學生可以出席，但學生叫佢唔使去，「已經找到另一位嘉賓」。


港大學生會會長黃政鍀話，大學生的確成日搵贊助，但好少見同學會攞成張清單出嚟叫人贊助，多數都係向大公司拎貨、食物或者現金。


至於請嘉賓，佢覺得如果搵其中一個目標嘉賓覆咗OK，比較好嘅做法應該主動同另外幾個交代。