免投票日甩轆 建制派擬早到場

【明報專訊】後日就係特首選舉大日子，喺最後衝刺階段，林鄭月娥同曾俊華競選辦都發動電話攻勢，做最後拉票工作，而好多建制派政黨都好自覺，已密密籌劃投票日行程，仲好有組織。雖然喺灣仔會展嘅投票朝早9點先正式開始，不過為免「甩轆」，大家都不約而同打算早早到場。


自由黨約大家樂食早餐

民建聯立法會一眾兄弟姊妹就打算8點半到灣仔，點好人數再齊齊入場。佢哋又話，為保險起見，按照往屆慣例，都會坐定定，等埋結果先離開。劉國勳就話早啲入場，以免到時投票有示威，受阻滯就唔好啦。


至於自由黨就約咗先喺附近食早餐，再一齊行去會展，有富貴黨之稱嘅自由黨，就約咗喺連鎖快餐店大家樂食早餐。主席張宇人就話，無諗住投完票留低，好肯定咁話唔會有第二輪投票，仲叫咗司機投完票就接佢去教會。經民聯亦有類似打算，應該都會約埋食早餐齊齊去投票。