民調問「能力」 林鄭薯片各勝一題

【明報專訊】今次特首選舉，唔少傳媒同坊間團體都有做民調，手握逾百選委票嘅民建聯同樣唔例外，噚日公布結果。問及3個候選人「邊一位較有管治能力」，林鄭月娥以50.8%遠超曾俊華嘅37.4%，胡國興只有2.6%。但問到「邊一位較有能力做下任特首」，曾俊華支持度就多過林太，分別為45.3%和44.2%，副主席周浩鼎形容兩人「叮噹馬頭」。


對於兩種「能力」嘅結果有咁大差異，副主席陳克勤就解讀，前者嘅「管治能力」評價係基於往績，「有迹可循」，但後者「綜合能力」則會受到選舉工程影響，屬印象分。今次民調並無問受訪者最支持或者認為邊個候選人最適合，陳克勤解釋唔想簡單流於表面，形容單純表態係咪支持係情感表達，不如問吓具體方面例如管治能力、係咪獲中央信任等。


隨着民調結果出爐，民建聯今晚會舉行特別會議決定最後投票取向，周浩鼎強調佢哋會綜合考慮候選人，不過感覺現時黨內大部分選委都係偏向林太。


今次民調係民建聯委託香港民意調查中心喺本月16至20號進行，以電話訪問730名18歲以上香港市民。