湯家驊﹕低票落敗幾難堪 梁家傑：胡官輸也是英雄

【明報專訊】今屆特首選舉，退休法官胡國興得到泛民選委支持，以180張提名票入閘參選，民主思路召集人湯家驊噚日喺電台節目話，泛民選委推胡官去選特首，如果胡官最終低票落敗，會係「幾難堪嘅結果」。湯家驊嘅前公民黨黨友、公民黨主席梁家傑就隔空回話，指就算胡國興低票落選，「我會為他鼓掌，稱他是英雄」。


湯﹕泛民提名 胡低票會不忿

今屆特首選舉，有兩名前司長曾俊華及林鄭月娥入閘，而法律界就有胡官，胡官嘅提名票全部來自泛民。湯家驊就話，胡國興高票入閘但可能低票落選會感到「非常之非常之不忿」，話如果胡國興得票好低，對胡官本人、胡官支持者及社會上對佢有正面看法嘅人，會係「幾難堪嘅結果」。湯家驊又話呢個結果係由選委做出嚟，指「點解有選委會將自己嘅提名票作為一種政治工具，表達自己嘅政治立場」。


梁：抗衡西環發揮角色

不過，提名胡官嘅梁家傑就喺自己facebook評論，話「我不認為有什麼需要難堪」。傑哥話胡官政綱開明，對另外兩個候選人構成壓力，喺抗衡西環治港為主調嘅呢場選舉中發揮一個獨特角色，就算胡官低票落選，都係英雄。


忙於選舉活動嘅胡官，似乎未係好關心兩個法律界後輩嘅言論，佢下晝出席教協嘅候選人論壇後，緊接參加咗一個少數族裔消除種族歧視嘅論壇，仲話同大小朋友言談甚歡，又話「其餘兩位候選人雖然亦有獲邀，可惜再一次只有我一個人參加」。