唔怕冇得做人大 田二少﹕只講事實

【明報專訊】港區人大代表、政協委員近日都齊集北京出席兩會會議，港區人大代表田北辰前晚就趁有時間，去咗北京有唔少酒吧嘅後海輕鬆一下，仲特登去間有駐場歌手表演嘅地方聽歌。田二少似乎都好鍾意後海呢個地方，亦感到幾新奇，大嘆香港就無乜類似嘅地方喇。駐場歌手見到有香港人，仲特登唱廣東歌，其中一首竟然係民主派都好鍾意嘅《海闊天空》，聽到田二少百感交集，認為兩地年輕人追求嘅都一樣。


人大選舉今年底換屆，大家都關注好敢言嘅二少，會唔會無得連任？佢話自己作為人大代表，都要為全國13億人發聲，佢透露，當初阿女都提醒佢，唔好因為從政而講唔忠於自己嘅說話，佢唔相信中央會因為咁覺得佢唔啱，因為中央都成日提醒大家要「毋忘初心」，強調自己過去講嘅都係事實，係「公開嘅秘密，大家都心照啦，只係大家唔講出來」。