GU登港　將售紀念商品

【明報專訊】日本快速時尚品牌GU，好快就會喺美麗華同皇室堡開張，網上面已經有好多人睇定日本有咩靚貨，準備香港分店一開張就去掃掃掃！噚日GU香港首席營運總監小倉慎司率先同香港記者見面，小琴都好期待究竟香港GU會賣啲咩，小倉話，目前喺日本揀選咗七至八成啱港人口味嘅商品嚟賣，女裝較多，遲吓仲會有慶祝香港分店開幕嘅紀念商品推出口添！
跟隨「全球定價一致」　價錢貼地
小倉透露，香港暫時唔會有獨家產品，但日後會有個別商品早過日本推出，心急嘅fans唔使再特登飛去日本買喇！另外，為咗慶祝香港分店開幕，公司會推出特別紀念商品，唔止香港，連日本、台灣等分店都會一齊出售，fans唔使驚搶唔到，因為紀念商品係冇限定出售數量，不過，小倉對紀念商品係乜東東就大賣關子，要到開幕當日先可以揭曉。
GU一向以「平、靚、正、潮」俘虜全球年輕人，好多港人都擔心香港分店嘅價錢唔夠日本抵，噚日小倉就介紹咗部分商品，好似女仔嘅平底鞋售價149元、最近大熱嘅choker頸鏈39元有條、連小倉嘅西褲都係149元，小琴覺得價錢相當貼地。小倉話，GU商品價格基本都係跟隨「全球定價一致」大方向，公司有一套formula去訂定全球價格，fans唔使擔心香港價會同日本差太遠啦！
email: piano@mingpao.com
[小琴密語]