楊潔篪多謝陳智思抽空上京

【明報專訊】中央港澳工作協調小組副組長、國務委員楊潔篪噚日出席港區人大代表團會議，會上重申中央對特首嘅四大要求。有與會者透露，會後佢逐一同人大代表握手時，有同林鄭月娥嘅競選辦主任陳智思話，多謝佢咁忙都趕上嚟，仲知陳智思即刻要飛返香港。


本身係人大代表嘅陳智思因為要兼顧香港競選工程，呢兩日不停香港、北京兩頭飛，忙到暈。佢前日凌晨3點先到埗，噚日中午又再同林鄭競選辦副主任陳勇一齊飛返香港，不過面對嚟緊連續多場論壇，佢都話唔知仲有無機會再飛北京喇。有人大代表就笑言，連楊潔篪都知道晒陳智思嘅行蹤，大嘆中央對香港發生緊乜嘢其實一清二楚。


陳智思咁勤力，有人就覺得佢係為咗求一官半職，不過佢噚日都話，無可能放棄工作、事業加入政府做全職工作。至於本身係行會成員嘅佢有無興趣升任行會召集人呢？佢就只係話，希望留啲空間畀林太去諗未來班子。