支持女性創業 香港列三甲

【明報專訊】今時唔同往日，唔少國家嘅女性除咗照顧家庭，好多都係事業女性，甚至做埋老細！萬事達卡就趁住一年一度嘅「三八」國際婦女節，首次發表Mastercard女性創業家指數報告，綜合唔同國家或地區嘅女性晉升機會、獲取知識同金融服務機會等嘅因素，睇吓全球邊個地方最有利造就女性創業家。


香港喺「具備支持女性創業的營商環境」方面得分相當高，有82.2分，喺54個國家或地區之中排名第三，而第一位同第二位分別係新加坡同新西蘭，分別得83.3分及82.6分，頭三甲得分相近，的確係叮噹馬頭；不過，如果睇埋晉升機會同營商便利程度等等嘅因素，整體得分最高嘅頭三位國家分別係新西蘭、加拿大同美國。


經濟愈成熟 唔等於愈多女企業家

不過，唔好以為經濟體愈成熟、愈支持女性創業，就愈多女性創業家。報告顯示，最多女老闆嘅十大國家之中，得4個係屬於高收入經濟體。雖然香港喺支持女性創業方面得分排第三，但只有22.9%嘅老細係女性；低收入經濟體烏干達竟然有最多女老闆，佔該地區整體34.8%。報告就冇特別解釋原因，可能低收入嘅國家，大部分女性都要出嚟擺檔幫補家計啩。


email: piano@mingpao.com

[小琴密語]