慶回歸20年 全球水墨畫大展暑假舉行

【明報專訊】如果由新石器時代嘅彩陶文化作為起點，原來中國繪畫至今已經有5000幾年嘅歷史。Emily留意到藝育菁英基金會將會喺今年8月3號至8號，喺會展舉辦「全球水墨畫大展」，作為香港回歸20周年慶祝活動之一，目前喺全球公開收集緊作品，今個月31號截止，之後評審團會從所有收集作品中，選出全球500強嘅水墨佳作，唔會計較畫家嘅國籍、年齡、身分，純粹以畫論畫，展出嘅畫作亦唔會拍賣，展覽後會還番畀畫家。


全球收集作品 選出500強

展覽將以現代及20世紀水墨為主題，大致分類為人物、山水、花鳥魚蟲、動物同現代水墨，據Emily了解，除咗國學大師饒宗頤為水墨畫大展親筆題字，多名水墨畫大師都會有作品參展，例如香港水墨大師王無邪、中國美術家協會主席劉大為，不過佢哋未定實到時會展出邊啲大作。