參觀禮賓府 小朋友見唔到CY失望

【明報專訊】禮賓府噚日舉行開放日，特首梁振英（CY）因到北京列席全國人大會議開幕，唔可以好似以往咁喺禮賓府同市民見面，但不礙市民參觀雅興，朝早9點半已經有過百名市民喺門外排隊。有小朋友話一心諗住可以同特首握手，點知願望落空。
7歲嘅陳小朋友話希望參觀特首住嘅地方，仲想同梁振英握手，經記者提醒先知原來特首唔喺香港後，小朋友話失望。陳太就希望囝囝可以從參觀中了解歷史，亦期望下屆特首可以關心民生議題。
13歲嘅何小朋友亦因為見唔到CY感失望，佢話支持梁振英，覺得佢雖然得唔到社會認同同民心，但喺房屋議題上已做到成績。佢又期望「薯片叔叔」曾俊華可以做到特首，有信心對方可以平衡社會，認為另一特首候選人林鄭月娥較偏激。
61歲退休人士馬先生第三次參觀禮賓府，佢話禮賓府環境優美，好多花卉喺普通公園未必可以見到，今次特登帶埋相機嚟。佢又話家社會多紛爭，喺3名特首候選人中，曾俊華明顯較受市民歡迎，但林鄭月娥入閘提名多，相信選到特首嘅機會較高，期望下屆特首真正為市民服務，營造和諧社會。