金庸不寫雍正 陶傑：與祖先抄家有關

【明報專訊】香港文化博物館嘅常設金庸館月初開幕，吸引大量金庸迷到場。噚日文化人陶傑同李純恩喺講座暢談金庸嘅生活軼事，陶傑話原來金庸小說冇寫雍正，係同當年雍正將查家抄家有關。
金庸自1955年寫《書劍恩仇錄》開始，至1972年完成《鹿鼎記》後封筆，合共創作咗15部武俠小說，當中寫過康熙同乾隆皇帝嘅情節，獨跳過雍正一朝。陶傑事後問番金庸點解，原來金庸話同雍正對查氏祖先抄家有關，陶傑並引述金庸話，「唔會同當初滅祖嘅仇人寫一隻字」。
陶傑又講到金庸為人含蓄，或者同查氏家族嘅經歷有關，佢舉例金庸喺文化大革命期間寫文章批評四人幫，行文唔算激烈，係斯斯文文咁批評。
書不離手 界薄幾本慢慢睇
李純恩話金庸愛閱讀，喺屋企都書不離手。佢又透露金庸睇書嘅「癖好」，會將厚書界成幾本「薄書」慢慢睇，睇完就用自己嘅方式黐番埋；金庸仲會自製封面，自己題字寫書名，難怪李純恩話次次見到金庸書櫃都有好多本白色封面嘅手作書。
陶傑形容金庸寫小說係「入咗另一個空間」，喺刀光劍影嘅世界同武林高手溝通，有時靈感到真係攔都攔唔住，就連當年同倪匡打緊麻將，金庸都要停一停，入房寫番一段小說先再出嚟攻打四方城。