抗霧霾 羅范港產納米口罩贈傳媒

【明報專訊】近年兩會期間北京天空都會出現「兩會藍」，但空氣質素依然未如人意， 「霧霾」天氣隨時再臨。港區人大代表、科學園主席羅范椒芬就好貼心，專登從香港帶咗一批香港製造嘅高科技口罩，笑言最適合喺北京採訪兩會嘅記者朋友。
呢啲口罩叫「納米纖維智能口罩」，Emily望吓包裝，話除咗過濾污染物外，仲有殺菌、隔絕病毒嘅效果。羅太介紹，口罩係產自政府注資嘅一間研發中心，而香港一共有5間研發中心，仲有好多其他產品。
自由黨倡駐軍負責灣仔七一升旗
另外，國民教育係今年兩會香港代表關注議題之一，自由黨今年提案特別建議，由今年7月1日起，每年七一金紫荊廣場舉行嘅升旗儀式，由解放軍駐港部隊負責。至於日常金紫荊升國旗儀式，可交由公眾諮詢，決定係咪繼續由香港警方儀仗隊負責。自由黨強調升旗儀式係一個「良機」，公開表明香港係中國不可分割一部分，形容可以畀港人上一堂生動嘅國民教育課，藉此震懾反中亂港分子。