17年前曾言「任何警員都不應打人」 葉劉撐七警解畫﹕感判刑重

【明報專訊】7個警員喺佔領行動期間將示威者曾健超拖到「暗角」拳打腳踢，七警最後判監兩年。做過保安局長嘅新民黨主席葉劉淑儀，上個月回應時就幫七警解釋，話佢哋都係受咗好大壓力，一時情緒激動啫。
「無支持佢哋打人」
Emily發現，早幾日無綫電視嘅《新聞檔案》，播番2000年警方喺政府總部外驅散示威者時，畀人話使用過分武力嘅報道。當時仲做緊保安局長嘅葉太出席立法會保安事務委員會，話任何警務人員都唔應該揮拳打人嘅，除非迫不得已要自衛，仲話會就事件調查。
唔通葉太喺17年後轉咗軚？Emily噚日同葉太傾過，佢就話大家係誤會咗，佢立場係無變過，佢話任何執法人員都唔應該濫用公權力打人，無支持佢哋打人，只係覺得刑期係過重，覺得可以就刑期上訴。
奮戰77日、賺咗經驗但仍然入唔到閘，無法參加特首寶座爭霸戰嘅葉太，噚日喺商台節目回顧選戰形勢，佢話今次中央明顯全力撐林太，令佢好蝕底。但係點解中央淨係撐林太而唔撐佢，葉太話，可能因為林太年紀較輕、可以一做十年，同埋做開又熟手。
葉太仲話，梁振英唔爭取連任對選戰部署好大衝擊，原本就算林太宣布參選都未覺得輸梗，但建制派選委綑綁提名真係綁得太緊，上周末都知自己大勢已去。
對「梁振英2.0論」震驚
不過，葉太話梁振英真係有機會做政協副主席，可能係退選條件；而早幾日出席一個全國政協委員個女嘅婚禮，聽到梁振英咁同支持者保證，將來有「梁振英2.0、3.0」延續施政路線，佢聽到都覺得「好震驚」。