競選辦3將為人大代表 兩會召開 林鄭失左右手？

【明報專訊】全國人大及政協兩會喺北京召開，港區人大代表、政協委員噚日都陸續去到北京，外界關注中央領導人呢段時間會唔會有任何舉動，影響香港嘅特首選舉。


不過兩會尚未有任何動靜，候選人林鄭月娥競選辦工作已經受到影響。事關林太競選辦主任陳智思，副主任陳振彬、陳勇都係人大代表，陣營頓暫失3個大將，睇怕都真係幾頭痛。Emily聽聞，有林營內部都笑住話，林鄭係享受緊「人大副委員長」待遇，因為每次遇示威，都有人大代表貼身做保鑣護送。


Emily噚日喺北京只見到陳勇身影，至於其餘兩位噚日暫時留守香港大本營。勇哥話，因為自己主要負責聯絡鄉議局、新界區議會、漁農界同宗教界，家完成任務就可以跟大隊上京。呢啲界別幾乎全票提名林鄭，睇嚟勇哥離港都無咁唔安落。


佢都話，做好心理準備隨時畀人急call返香港，都咪話唔舟車勞頓。至於陳智思，喺香港幫林鄭搞埋一啲手尾嘢，日內都會趕上北京。