陳冬接替張曉明？ 知情者：外間諗多咗

【明報專訊】國務院前日公布任命來自福建省嘅陳冬（圖）為中聯辦副主任，惹嚟揣測，有人估佢係唔係國家主席習近平嘅福建幫舊部，更有人傳到陳冬會接替張曉明做中聯辦主任。Emily噚日去打聽，有權威知情者就話，外間猜測諗多咗，根本唔係呢回事。


知情者話，習近平主政福建時，陳冬只係一個職位好低嘅官員，基本上同習主席無咩關係。其實，陳冬今次嚟香港，原因係原有7名副主任中，其中3人已屆60歲退休之齡，稍後有人會退休，所以陳冬早少少到任，熟習中聯辦運作，而佢將會主理青年事務工作。至於張曉明主任嘅去向，坊間有唔少傳聞，但就話遲少少先有定案，與陳冬來港無關。


知情者又話，其實好多人唔知，傳統以來中聯辦都有一個福建幫背景嘅副主任，之前有鄒哲開及王志民，而53歲嘅陳冬為福建羅源人，咪就係頂番福建幫副主任呢個位置。