僅次港台 ViuTV欣賞指數勝無綫

【明報專訊】免費電視競爭激烈，港大民意研究計劃最新一次電視節目欣賞指數調查，港台節目獲得71.32分平均分，繼續蟬聯四台之首；其餘依次係ViuTV（67.89分）、有線電視（67.72分）同無綫電視（66.84分）。


調查為舊年10月至12月播出嘅節目評分，港台節目口碑最好，頭10位有7套都係港台出品，包括排首兩位嘅《2016國際風雲大事回顧》同《鏗鏘集》；開台唔夠1年嘅ViuTV，就憑旅遊節目《404不存在的國落》躋身第四位。話就話係旅遊節目，但兩名主持人無大魚大肉，而係孭住背包，帶觀眾尋訪不獲聯合國承認嘅國家，例如塞波加公國。


新聞排名：有線now無綫

無綫最高分嘅節目《2016國際大事回顧》獲74.39分，排第八。調查亦關注認知度未及5%嘅「小眾」節目，ViuTV《夜曲13》同有線《往事．並不如煙之情書》分別攞到超過75分，前者係電視台新嘗試嘅實驗電視節目，拍攝香港夜深嘅人情故事；後者就講述名人嘅愛情故事。至於新聞財經報道，有線電視連續四次排榜首，now新聞排第二，無綫新聞得分跌1.38分，繼續排第三。