尖啤大減34磅 「夢寐以求」

【明報專訊】前全國政協委員劉夢熊去年因妨礙司法公正罪成判囚18個月，昨日刑滿出獄。身形魁梧嘅「尖啤」（dream bear）足足瘦咗34磅，佢話減肥成功係過去幾年夢寐以求嘅事。


感親情可貴 「令我淡泊致遠」

劉夢熊噚日返屋企梳洗過後接受本報訪問，佢話出獄前一晚徹夜未眠，「我一分鐘都無瞓過，因為好多嘢諗」，又話獄中已接獲眾多傳媒邀約訪問，要整理思緒同部署行程。佢話喺監獄一年時間，深深感受到政治嘅黑暗，形容係「欲加之罪，何患無辭」，但就感受到親情可貴，「咩叫親情可貴、友情崇高、愛情偉大，真係令到我淡泊致遠，我思想都有一個新境界」。


每日閱報兩個鐘

瘦咗一圈嘅尖啤話，獄中生活好有規律，每日食完早餐都會睇兩小時報紙，包括《明報》、《蘋果日報》、《信報》等多份報章，近日最留意嘅新聞就係前特首曾蔭權因公職人員行為失當罪成。除咗每日閱報外，佢喺獄中睇咗30幾本書，最愛《邱吉爾傳》，同埋講述文化大革命重要人物、中共前文革小組最後一個成員戚本禹嘅《戚本禹回憶錄》。


有傳尖啤喺獄中大受歡迎，好多在囚者視佢為「劉教授」，尖啤對此不欲多談，「入面嘅事，我就衣袖一揮，不帶走一片雲彩，我就要向前看」。