奧斯卡擺烏龍 曾俊華有感悟：未到最後不知真正結果

【明報專訊】林鄭月娥噚日終於宣布全面政綱，係噚日香港焦點之一；另一邊廂，適逢美國奧斯卡頒獎禮發生頒錯最佳電影獎事件，曾俊華即喺facebook專頁度抽水，話噚日最矚目新聞非奧斯卡擺烏龍莫屬，仲留言話自己同競選辦同事一齊睇頒獎禮，感悟到「未到最後一刻，永不會知道真正結果」。


噚日奧斯卡壓軸頒發最佳電影獎時，錯誤宣布《星聲夢裡人》奪獎，其實《月亮喜歡藍》先係真正贏家；而已獲選舉主任確認成為特首候選人嘅曾俊華，就隨即喺自己嘅facebook專頁度抽水，被認為係借題發揮論選舉，唔少網民讚佢「貼地」又「靚抽」。


新宣傳片：不如相信每一個人

之後曾俊華又喺facebook上載新嘅宣傳短片，片中有唔少人講到過去香港幾年有唔少衝突同矛盾。短片出現嘅人物自認係「曾俊華」，話近年唔少人因為政見不同，喺fb上unfriend朋友、退出WhatsApp群組，最後真版曾俊華就話，「其實我係唔係曾俊華唔係最緊要，因為相信一個人，不如相信每一個人」，呼籲香港人同佢一齊拍住上，要令香港重回正軌。呢段分幾鐘嘅短片，播出3小時有近20萬次瀏覽，獲近1.9萬個「讚好」及「心心」。


唔覺自己係泛民候選人

曾俊華噚日下午仲去咗接受民主黨前立法會議員劉慧卿（卿姐）訪問，卿姐笑問曾俊華拎住咁多非建制選委（125人）嘅提名，係唔係「泛民候選人」，曾俊華立即笑住向卿姐道歉話「我唔覺得自己係，對唔住」，仲話之後會繼續爭取非建制同建制選委支持，但就話家好難講有幾多選票喺手。