林鄭青年政綱被揭似曾相識

【明報專訊】特首參選人林鄭月娥噚日公布完整政綱，當中花咗唔少篇幅去講青年政策，建議設立平台渠道，鼓勵青年議政和參政。不過，呢個建議一出，旋即被質疑係「抄橋」，因為同一個政策倡議比賽參賽作品相似，而有關比賽由林鄭競選辦中人之前負責嘅。


去年一個名為「為正策士」嘅智庫舉行咗一個公共政策游說比賽，其中一個題目就係青年政策。「為正策士」由陸瀚民任召集人，佢目前喺林太競選辦工作。


曾經參賽嘅後生仔Jonathan Chan噚日就喺facebook話，自己參賽作品係建議成立一個屬於政府諮詢委員會嘅「青年議會」，為年輕人提供議政平台。青年人可以透過呢個平台，辯論同撰寫書面議案，呈交政府參考同跟進。Jonathan仲話「原來我同一班朋友思考既（嘅）程度已經去到林鄭嘅層次」。至於兩者嘅建議有幾相似，留待讀者自行判斷。