羅健熙點評特首參選人信件

【明報專訊】為咗爭取支持，4名熱門特首參選人都有寄信畀選委闡述自己嘅參選理念同政綱等。民主黨南區區議員羅健熙噚日就喺facebook比較4人嘅信。佢話喺鋪排方面，林鄭月娥、葉劉淑儀同曾俊華都係用公務信件形式，胡國興嘅行文就似政府文件。4人都係由宣布參選講起，非常傳統穩陣。


個名「被刪」唔開心

信件抬頭方面，葉太用手寫，林太封信本身已經印咗羅健熙個名，但就用筆刪走，再手寫上「Dear健熙」，羅健熙話林太令人感覺「想扮熟」，但佢睇見自己個名被人刪咗就好唔開心。至於曾俊華，就用電腦打印選委嘅名出嚟；胡官就只係統一印上「尊敬的選舉委員會委員」，收信者人名欠奉。


林太喺信入面「間低」咗唔少重點，羅健熙就覺得難以接受，仲話間住嗰啲根本一啲都唔重要。至於薯片個競選logo係連埋啲字一齊print出嚟，而且印刷解像度唔太高。羅健熙又點評葉太寄過最多次信畀選委，而最新一封係針對社福界改良佢政綱嘅仔細分析，令佢意想不到。