陪審員津貼加碼14.7% 一日830元

【明報專訊】近期最轟動嘅新聞，要數前特首曾蔭權因公職人員行為失當罪成判囚1年8個月，成為香港回歸以來被定罪同入獄嘅最高級官員，Emily記得單case上個月開審嗰時，有被抽中嘅陪審員因為宣誓嗰陣唔識讀「almighty」，所以獲法官豁免唔使做呢單案嘅陪審員，之後佢行出庭就揸緊拳頭大叫「Yes！」，似乎對於唔使做陪審員好興奮咁喎！

其實，做陪審員係公民義務，對司法制度嚟講係好重要，而且做陪審員每日都有津貼的。行政署噚日公布，陪審員每日嘅津貼仲會加碼14.7%，由家每日725元，加到830元。政府下月1日會以先訂立後審議的程序向立法會提交修訂。


另外，如果被傳召做刑事法庭同死因研訊證人，每日津貼嚟緊會加碼，最高每日有515元，專家證人就加到2770元，政府計劃下月29日向立法會提交呢兩項規則待審議通過。法例通過後，終審法院首席法官將會指定實施日期。