劉玉燕印度教小朋友洗手唔易

【明報專訊】聯合國兒童基金會（UNICEF HK）噚日舉行春茗午宴，剛到印度考察嘅總幹事劉玉燕亦都在場，仲同大家分享上周喺印度考察嘅見聞，佢話最深刻就係成日要教啲小朋友洗手，仲話洗手要做足咁多個步驟，相信好多香港人都唔知。


劉玉燕話，雖然佢已經去印度一啲較早發展嘅地區探訪，但礙於習俗唔同，當地小朋友都唔習慣先洗手再食飯，但咁樣好易病。佢話要洗乾淨雙手有好多步驟，除咗要用肥皂，仲要洗搓手掌、手背、指隙、指背、拇指、指尖同手腕20秒，仲話好多香港人都唔知要咁洗法先係最正確。


UNICEF今次去印度，主要去了解當地嘅幼兒教育，而UNICEF喺當地設咗幼兒教育嘅培訓中心，希望小朋友可以玩遊戲、唱歌同跳舞嘅形式學習生活技能，又話見到班小朋友玩得好開心，隨後就笑言，可能香港小朋友見到都會好羨慕印度呢班小朋友，因為佢哋真正可以完全喺遊戲中學習，真係好難得。