「I don't see anything connected」 被Siri打斷 陳茂波﹕唔知咩事

【明報專訊】許步明撐場 眼泛淚光
陳茂波首次以財政司長身分宣讀財政預算案，陳太許步明噚日都有現身立法會旁聽席撐場支持。唔知係咪結語部分太感人，陳茂波寄語香港「風雨過後，總會更見精采」嗰陣，許步明一度聽到眼泛淚光，用紙巾抹眼角。陳太離席時被記者追問點睇老公表現、會唔會支持佢做多一屆，佢就無回應。
陳茂波噚日宣讀預算案時發生咗小插曲。佢讀到中段時，突然傳出電話聲，相信係唔小心觸動咗放喺枱面上iPhone嘅Siri，一句「I don't see anything connected」都入埋咪。陳茂波當場都好愕然，話「對唔住，唔知發生咩事」。有網民就講笑，唔知Siri呢句話會唔會都落埋立法會會議紀錄度呢。