讚前瞻方式善用盈餘 CY「非常認同」茂波預算案

【明報專訊】特首梁振英（CY）「愛將」、財政司長陳茂波走馬上任一個多月，噚日發表任內首份預算案。對於陳茂波嘅「處子作」，老細CY噚日高度評價，用上「非常認同」字句，讚賞茂波提出嘅公共財政目標同方向。


林煥光讚「難以抗拒」

Emily留意到，對於上一任財爺曾俊華嘅表現，CY喺過去4年預算案後公布嘅聲明，僅2014年用過一次「認同」，話贊成曾俊華提出加快人流、物流、資訊流通。


CY噚日評價茂波嘅預算案，話預算案推出嘅一系列措施，唔單止令市民分享經濟發展成果，同時用前瞻方式善用盈餘，預留資源喺安老院舍、青年及體育等發展。其實，曾俊華之前都算有份參與制訂呢份預算，唔知CY今次嘅讚賞，曾俊華會唔會都與有榮焉？


行政會議召集人林煥光噚日喺立法會聽完宣讀後，亦讚係「一份難以抗拒嘅預算案」，指茂波上任咁短時間，面對艱巨學習過程，而推出咁全面嘅預算案，係「十分難得嘅工作成就」。佢又指喺保持香港穩健局面下，茂波仲可以喺多方面作出長遠、短期紓緩措施，希望社會各界支持。