母親癌復發 「摑醒」劉鳴煒

【明報專訊】青年事務委員會主席劉鳴煒支持協青社，今年佢再度粉墨登場，但唔係再跳踢踏舞，而係會表演打木箱鼓。噚日佢出席傳媒預演時就自爆人生曾兩度迷失方向，提到兒時父母劉鑾雄、寶詠琴對佢期望唔高，只求佢唔好學壞，直至14歲佢媽媽癌病復發、去咗外國醫病兩個月後，佢再探媽媽，突然發現媽媽面色好差、甩晒頭髮。呢個情景當堂「摑醒」佢，於是佢喺半年內發憤讀書，想盡快畢業同入大學畀阿媽睇，結果當年佢考晒A番嚟，之後仲入到英國嘅大學。
發憤讀書 盼升大慰母
劉鳴煒其後讀博士時，即使日日喺圖書館十個鐘，但幾個月論文一隻字都寫唔到，再次迷失方向，佢明白與其喺圖書館苦無想法，不如停一停，結果佢走去考機師牌，當畀自己一個假期，之後做教練，每日教人時學會待人接物、理解年輕人想法等，至今仍覺受用。9個月後有一日，佢突然對自己本來嘅論文有新想法，於是辭工重投論文寫作，又畀佢過咗一關。
除咗有劉鳴煒幫手，年少時曾受助於協青社嘅Tommy，亦有現身講述佢由無目標嘅少爺仔，點樣透過學習街舞等活動學會自律、堅持，今年28歲嘅佢已考咗機師牌，為客人駕駛私人飛機，佢噚日都有露兩手表演街舞。協青社街舞劇《東．南．西．北．中》4月2日會喺沙田大會堂舉行，大家有興趣可以留意。