Sell過錢新App 八達通高層：可找麻將數

【明報專訊】特首參選人林鄭月娥之前喺港鐵用八達通拍卡後要人提佢至識入閘，八達通行政總裁張耀堂話好難就此表達意見，佢之後補充，話第一次唔識用，第二次就識，八達通好易用。


除咗拍卡買嘢同坐車，八達通舊年推咗個新App「好易畀（O!ePay)」，可以用佢過錢畀朋友，八達通就力sell同人食飯夾錢。


八達通技術總監甘志深話，O! ePay仲可以用嚟打麻將找數，按個掣就可以找麻將數，真係好方便。


唔講唔記得，原來八達通喺回歸嗰年誕生，即係今年就係20周年。八達通前年開始免費更換第一代舊卡，張耀堂話至今只係換咗約60萬張，仲有逾130萬張未換，隨住軟件更新，有需要盡早換卡，遲吓要諗諗係咪要強制換卡。