70年代波士頓齊學中國舞 陳慧珊讚曾俊華「剛柔並重」

【明報專訊】特首參選人曾俊華（John）搵咗唔少人幫佢拍宣傳片，過去幾段都畀網民唔少驚喜，噚日佢就喺facebook上載主演過《壹號皇庭》、《衝上雲霄》嘅藝人陳慧珊（Flora）嘅「打氣片」，原來兩人識於1970年代，仲一齊喺美國波士頓學中國舞！Flora大讚John剛柔並重，學習能力高，又大爆John做過舞團「男主角」、暫代隊長。


「識弓舞騎馬舞　仲識絲帶舞」

Flora話John由細睇到佢大，「我當佢係大哥哥」，大家對中國舞蹈嘅熱誠連結到兩人緣分，而Flora嘅爸爸就係John嘅舞蹈老師。Flora話John係男主角，個子高、學習能力好高，只係睇過幾次嘅舞步就識，除咗跳弓舞、蒙古騎馬舞比較剛硬嘅舞蹈，仲會跳絲帶舞，反映佢個性剛柔並重，「唔係淨係企硬、一定要用剛硬嘅手法」。


與李小龍一樣「be water」

Flora又讚「鬍鬚哥哥」有創意同變通，亦係好好嘅聆聽者，而佢最近攻讀緊教育博士學位，John都好支持佢；佢相信John會欣賞「教育係向前邁進嘅道路」呢個理念。Flora話John好鍾意李小龍，佢覺得兩人有一樣嘢好似，就係「Be water, my friend（記得要像水一樣）」，所以John好識變通。


Flora又話John喺舞蹈團有時會暫代隊長職務，面對突發情况好快做決定，又有幽默感，令身邊人好想親近佢。Flora話覺得自己同「鬍鬚哥哥」好似，即使喺美國學習西方教育，但個心一路都好「中國人」，好喜歡中國文化。Flora期望曾俊華可以當選特首。