周浩鼎：提名得罪人說法「有啲驚奇」

【明報專訊】長和系主席李嘉誠日前話今年特首選舉只投票唔提名，因為提名會「得罪人」。民建聯副主席周浩鼎（Holden）噚日出席民主黨前主席劉慧卿（卿姐）主持嘅網台節目，被卿姐問到「得罪人」說法，Holden話感到有啲驚奇，指提名「唔需要驚」，作為選委如果話驚得罪邊個就唔提名，唔係好符合大眾期望。
Holden話，自己未決定提名邊個，半講笑話可能最後唔提名，強調唔係怕得罪人，而係有自己考慮。
卿姐就形容李嘉誠嘅說法令人不安，因為李嘉誠作為「大有錢佬」，相信對方係怕得罪權貴，做錯事會被人算帳，「唔通（怕）得罪啲升斗市民咩？」
民主黨中委會早前決定推薦提名曾俊華，其中7個立法會議員率先提名。現時只係普通黨員嘅卿姐喺節目後話，自己唔認同小圈子選舉、唔想為小圈子選舉「塗脂抹粉」，但市民有諗法，自己亦尊重中委會決定。民主派近日經常討論邊個參選人係「lesser evil」，卿姐就話難講邊個係。
早前林鄭月娥上卿姐節目受訪，卿姐噚日就透露，曾俊華下星期一都會上佢節目接受訪問。