新聞類別
財經
詳情#
【明報專訊】打工仔「午飯減薪」、「做嘢加辛」成為近排城中熱話,不過其實香港仲有好多良心僱主,好似大部分華資公司,午飯時間唔單止有薪,仲包埋伙食添。美中不足就係好多華資公司,仲係行緊5日半甚至係6日工。不過,新世界百貨(0825)企業事務總監胡玉君就話,佢哋公司都喺今個月開始實行5天工作制,真係值得其他企業效法呀!
華資大企業多包伙食
小琴尋日同靚女Rebecca(胡之洋名)食晏,講開食,原來新世界發展(0017)都興包伙食,員工午飯時間可到集團canteen免費享用午飯,而且餸菜唔係一般大連鎖店貨色,而係專登請廚師返嚟煮呢餐晏。其實不少華資公司好似新地(0016)同恒地(0012)都有包伙食,的確好有人情味。
不過,小琴就話,華資公司好多仲行緊5日半工甚至係6日工(據了解新地、恒地都係5日半工、長短周),呢方面認真有待改進,點知Rebecca話,新百貨今個月開始已經實行5天工作制,唔怪得知個樣咁醒神啦!原來新創建(0659)同新世界中國(0917)一早已實行5天工作,今次到新百貨,又多一班員工受惠,真係聽見都開心。
計小琴話,政府除咗立法規定最低工資,最好可以立法硬性規定5天工作,咁就真係造福人群咯!
留言 (0)