限50個 今加碼1倍 「黯然銷魂漢堡」登場 一個鐘賣晒

【明報專訊】周星馳喺電影入面有「黯然銷魂飯」，而專賣「黯然銷魂漢堡」嘅美食車噚日終於登場，雖然佢比較遲開檔，但都大受歡迎，50個漢堡唔夠一粒鐘就賣晒，決定今日加碼1倍，準備賣100個。
主打「黯然銷魂漢堡」嘅「樺得園×七桌子」美食車噚日喺起動九龍東海旁開業，負責人林瑞華話，每個「黯然銷魂漢堡」賣68元，無食客話貴，之前預備50個，開檔前已經有人預訂咗20個，全部唔夠一粒鐘就賣晒。佢話銷情比想像中好，決定今日加碼賣100個。
旅遊事務署公布，新一輛美食車Beef & Liberty已經拎到食物製造廠牌照，下周一（20日）喺海洋公園外營運。連埋之前開業嘅美食車，已經有12架美食車開咗檔，仲有4架準備緊未登場。