「鐵達尼」海報提醒小心水管漏水 工聯會陸頌雄：想做渠王

【明報專訊】工聯會立法會議員陸頌雄，本身喺天水圍嘅區議員，佢噚日喺facebook上載一張好誇張嘅海報，用鐵達尼號下沉做背景，話「廁所漏水分分鐘好大鑊」，仲話漏水唔講得笑。Emily問陸頌雄究竟搞咩，原來佢選區天恒邨早排有街坊廁所爆鹹水喉，足足搞咗粒幾鐘先關到水掣，結果單位變成澤國，大廈走廊都水浸！


「廁所漏水分分鐘好大鑊」

陸頌雄就話，屋邨都有十幾年樓齡，有啲喉管都可能老化，所以出海報提提住戶，如果發現輕微漏水，就快啲通知房屋署或者佢議員辦事處，等到爆水管先搞就太遲。佢話好似早排嘅住戶個案，真係幾慘，爆水管後通知保安員，但無人識去閂水掣，所以先至搞到水浸，屋企家具都浸壞。佢仲有相為證，上載街坊單位水浸相證明自己唔係亂作。


Emily問陸頌雄，作為區議員會唔會上門幫人整水喉，佢就話自己唔識整，但講笑話可能都應該去考番個水喉匠牌，因為現時議會有「鼠王」 、「蝨王」，佢或者可以做「渠王」。