旅行睇選戰新聞 陳永棋漫遊費幾千

【明報專訊】特首選戰如火如荼，不過選委之一嘅全國政協常委陳永棋早前就遠離「烽火之地」，同老婆橫跨半個地球去咗非洲玩足10日，連林鄭月娥分享大會都無出席。Emily噚日喺政協選委同林太會面嘅場合，見到前兩日先回港嘅棋哥，佢膚色明顯曬黑咗一截。佢除埋手表同眼鏡畀Emily睇，即刻見到「前後對比」。
不過唔好以為佢旅行乜都唔使牽掛，棋哥話自己經常睇住香港選戰新聞，點知返港收到嘅電話費帳單嚇死人，漫遊費高達幾千蚊，都咪話唔肉赤。其實陳永棋去旅行，經常有驚險嘢發生，試過畀雷劈，而今次去非洲打高爾夫球，都算平安歸來。