墨龍父子為減持解畫﹕籌錢借公司渡難關

【明報專訊】我哋成日話父母對子女嘅關懷係無微不至，近排山東墨龍（0568）主席兼大股東張恩榮（圖）父子喺盈警前偷步減持股份，畀中證監重點立案調查，噚日公司就回覆深交所關注信，話張氏父子今次減持係為咗確保有錢可以借畀公司渡過難關，嘩！聽落真係好感動。


中證監立案調查 凍結交易

事件要追溯返去2月初，山東墨龍發盈警，話去年虧損將按年擴大最多1.4倍，仲可能畀深交所加上退市風險警示，搞到股價大跌，但神奇嘅係，公司喺舊年10月先發盈喜嚟！只係短短3個月竟就由賺變勁蝕；而最神奇嘅係，喺呢段由賺變蝕期間，張恩榮同佢個仔張雲三竟然暗地裏減持公司股份，最終畀深交所發現兼凍結佢哋交易。


山東墨龍噚日喺公告度解釋，話張氏父子減持股份，完全係因為擔心公司無錢，要籌定錢借畀公司，仲話家銀行借錢唔易，所以先迫於無奈減持，小琴睇完有咩反應？一個字，閱。


email: piano@mingpao.com

[小琴密語]