林鄭老公情信提一國兩制 薯片﹕今日只談一生一世

【明報專訊】噚日情人節兼特首提名期開始，兩大特首參選人林鄭月娥同曾俊華分別喺facebook曬情書，隔空放閃。林太先公開丈夫林兆波嘅情信，提到林兆波期望老婆當選後「為落實一國兩制作出貢獻」。曾俊華則緊接喺fb發表《給香港的情書》，標籤係「#今天我們不談一國兩制只談一生一世」，唔止係閃光彈，仲有啲火藥味添。 林太謝老公「蒲頭」 曾寫情書畀香港

林兆波自太太參選後一直未現身，佢噚日就喺信中話對太太「支持無限」，但因自己一向低調，「對個人儀容又不着意」，故不願面對大眾。佢話本身「不反對但亦不贊成」太太參選，期待佢任期屆滿後可以重溫婚後甜蜜，例如外遊、睇戲。佢又話期望太太成功當選，「在新崗位上為香港市民努力工作，為落實一國兩制作出貢獻」。

林太噚日接受商台節目訪問時，就被主持陳志雲要求公開講一句「最冧嘅說話」畀老公，佢就答「多謝你蒲頭，希望你繼續蒲頭」。咁呢封情書係咪出自佢老公手筆呢？林太就話，佢只係幫老公改咗幾隻錯字。

「薯片叔叔」就準備咗一封《給香港的情書》，並上載同妻子午膳嘅相。曾俊華喺信中話，「情人節」嘅真諦唔係情人，而係幸福，但香港經歷風雨，市民對政府失去信任，撕裂嘅關係只會帶來痛苦。佢祝願，5年之後嘅情人節，港人能夠講「我生活在香港，感到幸福」。曾俊華不忘抽水，喺最後hashtag「#今天我們不談一國兩制只談一生一世」。

至噚晚9點，曾俊華嘅情信有逾2萬「讚好」、十幾個「嬲嬲」；畀林太嘅情信就有5500多個「嬲嬲」、逾千個「讚好」。至於退休法官胡國興噚日就拍片，手持一紮玫瑰向老婆示愛，又話對唔住，因為參選太忙，希望開埋個會趕得及同老婆食餐飯。