情人節前夕放閃 曾太爆丈夫自製情書

【明報專訊】今日情人節，特首參選人曾俊華噚日喺facebook專頁上載太太黃蓮華拍片支持佢嘅片段，曾太笑言唔覺得丈夫浪漫，老公亦未曾講過「嗰三個字」，但就會含蓄地表達，例如喺大學時自製圖文並茂嘅「情書」，記載二人拍拖點滴。曾太又大讚丈夫處理事情及解決問題能力好高，對佢「非常佩服」，「既然佢有呢個（參選）使命，我覺得佢會努力去做」。


曾俊華未講過「嗰三個字」

條片一開始，曾太便「恭祝John和全港市民情人節快樂」。曾太被問係咪家中「女特首」，佢無承認，但笑言「總言之屋企就由我管」。


與曾俊華結婚45年嘅曾太細訴與丈夫邂逅經過，兩人喺波士頓嘅大學一年級火雞節（感恩節）認識，男同學都要按傳統穿西裝，帶女伴食晚餐，曾太當時就係John嘅女伴，兩人更一見鍾情。


曾太話老公畀佢嘅自由度好高，被問到曾俊華有咩缺點，曾太話「唔覺佢有咩缺點」，但佢話兩人從不慶祝生日及結婚紀念日，曾俊華亦唔記得幾時結婚同自己生日，相信佢都唔會記得幾時係情人節。但曾太讚丈夫解決問題能力非常高，佢記得大學一年級仲未適應大學嘅學習模式，擔心趕唔切交功課，曾俊華主動幫忙，即使唔熟悉醫護題目，仍寫出幾頁答案，令佢佩服到不得了。