姚松炎朱凱廸辦橫洲規劃設計賽

【明報專訊】立法會議員姚松炎同朱凱廸噚日喺元朗公布舉辦「城鄉永續發展——橫洲規劃設計比賽」，等公眾參與新發展區域設計，今次比賽除咗會有由評判選出嘅優勝作品，另設有「村民最喜愛大獎」，由村民揀一個佢哋最鍾意嘅參選作品，獲選者禮物好特別，就係「橫洲村民招待宴」。


政府早前提出分期發展橫洲土地，姚松炎話佢發起比賽有3個原因。首先，佢話橫洲面積大、單位多，正係一個契機等公眾集思廣益，期望得到更好嘅規劃方案。同時佢期望畀專業人士發揮所長，改善橫洲規劃設計。另外，佢話近期有多宗「黑箱作業」事件，如「西九故宮事件」，所以想橫洲項目更透明。


朱凱廸就話希望透過比賽「撥亂反正」，指受影響村民唔清楚整個發展項目，所以佢都呼籲村民參賽，規劃屬於佢哋自己嘅橫洲項目。參賽者要喺4月16日或之前遞交作品，比賽詳情可瀏覽網址（www.edwardyiu.org/wcpc-latestnew）。