「中西合璧」虛擬情侶介紹建築展覽

【明報專訊】環保署嘅「大嘥鬼」大受歡迎後，唔少政府部門都會搵「代言人」，家連康文署及古物古蹟辦事處舉辦嘅展覽，都搵嚟1920年代嘅跨文化虛擬情侶「英和」同「瑪莉」，以佢哋嘅經歷見證香港歷史變遷。


著長衫嘅英和係新界圍村人，接受傳統教育；著洋裙嘅瑪莉就喺港島市區長大，讀教會學校。古物古蹟辦事處一級助理館長伍德昌話，英和同瑪莉原本唔識對方嘅文化，後來譜出中西合璧嘅愛情故事，英和介紹展覽入面嘅錦田長春園鑄鐵關刀同練武石，因為舞關刀同舉練武石，係以前應考武科舉要過嘅兩大關；瑪莉就會介紹有168年歷史嘅聖約翰座堂，帶大家睇吓有近120年歷史嘅第一代主教座，兩邊扶手有龍頭雕刻，又係香港先有嘅中西特色。


「時代•憶記——活在香港歷史建築展覽」將展出50幾件展品，即日起至5月1日喺九龍公園文物探知館舉行。古蹟辦嘅土地測量師郭健恆就話，今次展覽用咗唔少高科技，好似用三維立體掃描儀，實地收集唔同建築嘅數據，再將建築物嘅立體影像投射到牆上，好似元朗廈村鄧氏宗祠咁，公眾伸手掂投影牆，就可「走入」祠中近距離觀賞。