現身龍和道撐渣馬健兒 曾俊華鼓勵跑手反獲打氣

【明報專訊】特首參選人曾俊華噚日現身金鐘龍和道，為渣打馬拉松選手打氣，唔少選手一見到曾俊華即蜂擁而上，停低同佢自拍。但原來同曾俊華打氣嘅人仲多，好多選手都叫佢「加油」、「支持你」，仲有人叫曾俊華做「未來特首」。


曾俊華現身時，在場有市民大叫「薯片叔叔」，曾俊華企喺行人路上同選手打氣，仲無間斷地同跑手握手及擊掌「high five」，由市民自發嘅啦啦隊成員就圍住曾俊華自拍。更有市民隨手拎出薯片，請「薯片叔叔」食，曾俊華大笑幾聲婉拒咗。


曾俊華事後喺facebook話，「To run or not to run？其實競選也像馬拉松，漫長的路程，難免令人疲累，終點看似遙遠，難得沿途有你們支持鼓勵，讓我有鬥志繼續走完未完的路。」佢段fb live片，上載10小時後有近30萬次瀏覽。


不過，有個網民留言解釋點解畀「嬲」，指喺維園見到曾俊華嘅海報， 喺馬拉松嘅告示板上，質疑曾俊華騎劫，呢個留言惹來網上熱論。曾俊華競選辦團隊隨即網上留言回覆，解釋有關海報唔係佢哋嘅宣傳品，仲話會將有關情况匯報選舉事務處。嗰個網民知道後，留言話收番個「嬲」，讚賞曾嘅回應。


胡官偷得浮生嘆鴛鴦

另一邊廂嘅「林鄭辦公室」，噚日喺facebook無咩動態，林鄭月娥今日就會公布喺教育、稅務及置業三方面提出嘅政綱。胡國興就喺fb上載見完選委嘅歎茶相，話偷得浮生，「開會之間又有機會嘆杯鴛鴦」。