救人大隻警受訪 網民叫除衫

【明報專訊】前日有單內地客跳河新聞，一個警員落河救人之後，畀記者影到佢大隻身形，即刻成為網上熱話，警隊噚日就搵呢位「型警」做生招牌，喺facebook上載佢嘅訪問片段。


原來「大隻警」叫阿文，隸屬沙田分區軍裝巡邏小隊。主持話，唔少網民擔心赤裸上身嘅阿文有冇凍親，阿文就話自己無事，多謝網民關心；至於身材點練返嚟，阿文就話都係以前做得多運動鍛煉返嚟嘅。


佢又分享當晚經過，又話「冇嘢係解決唔到」，呼籲市民珍惜生命。


部分網民似乎醉翁之意不在酒，可能嫌阿文接受訪問時着得太密實，留言叫佢「除衫」，連警察fb小編都問點解著得咁密實，不過都有網民幫口，話天氣咁凍都唔著衫好易病。