梁福元去馬參選？ 其實係恨退休

【明報專訊】特首選舉如火如荼，鄉事向來喺選舉時期都唔多安分，十八鄉鄉委會主席梁福元噚日喺佢元朗大宅搞團拜，仲拉埋隻駿馬即場上馬試身手（圖），唔通佢都有意落場跑馬仔？梁福元講笑話，鄉議局主席劉業強平時鍾意睇馬賽，而佢就反而鍾意親身騎馬，仲話平時自己巡荔枝山莊都係騎馬上陣，真係有功架。


講還講，鄉議局作為愛國愛港堅實一分子，當然緊跟中央路線，據知，委員長張德江南下見各團體嗰陣，劉業強主席都有份出席。梁福元就透露，自己同大部分鄉議局選委已簽咗提名表，仲交埋咗畀主席，到時就睇主席最後決定。上屆最後搞到鄉事要集體轉身支持梁振英，被問到會唔會擔心今屆會有一樣情况，梁福元都大呼「唔好喇掛！ 」


梁宅鳥語花香，梁福元話想早啲退休，唔想好似新界王發叔咁近80歲先可以退落嚟。佢嘅細仔、元朗區議員梁明堅原來已默默為接班熱身多年，學歷都唔嘢少，包括本科係英國名校UCL電子及電機工程，中大園林及樹藝專業文憑，家再讀埋心理學，相信梁福元嘅心願都好快可以實現。