張建宗愛返工 「有得落場好興奮」

【明報專訊】曾經表示多年無放大假嘅政務司長張建宗，噚日中午出席立法會午宴時話，自己農曆年都無額外放假，只放紅日假，Emily問佢咁做，有無「做壞規矩」，被人鬧時，佢就話唔放假「係難度高、亦不宜模仿嘅危險動作」，仲話佢雖然唔放大假，但同事係有放足假期、無投訴。


張建宗又對返工發表金句，除咗繼續講「每朝早打呔返工就好興奮」，噚日仲話「好似球員，有得落場好興奮、演員有得演出好開心！」張建宗話要珍惜每一日工作，「返工好有動力」。