學生問菠蘿包價錢 曾俊華：睇你邊度買

【明報專訊】特首參選人曾俊華「吸金」能力驚人，推出眾籌數日，直至噚晚已經累積到440多萬競選經費，超過2萬幾位市民參加。不過佢前日推出嘅政綱，有關23條立法同重啟政改部分惹嚟部分市民不滿。


薯片叔叔噚日去樹仁大學嘅交流會，遇到學生提出尖銳問題，質疑佢只係靠形象贏支持，又問如果有市民要求佢回水得唔得。薯片叔叔就話，回水好困難，因為唔知係咩人捐咗錢，「想回水，真係對唔住喇」。


佢之後又畀學生挑機，質問佢知唔知家粟米斑塊飯同菠蘿包價錢。2011年唔知粟米斑塊飯價錢嘅佢，今次就難唔倒佢，薯片叔叔話要睇你去邊度買，話菠蘿包最平4元有一個，貴嘅都要8元，力證自己唔離地。佢又講番自己參選後，曾去過冬菇亭吃過豆腐火腩飯，屋邨價都要50幾元一個，一啲都唔平。