財會將審議官員加薪 陳健波：已收泛民225修訂

【明報專訊】農曆年假結束，立法會財委會周五及周六預料又會火花四起，因為會一連兩日審議下屆問責官員加薪嘅撥款申請，泛民表明會拉布，財委會主席陳健波話，暫時已收到225條修訂。


加薪調低0.4百分點省40萬

政府原建議下屆嘅問責官員加薪12.4%，但噚日政府提交文件，話按統計處公布丙類消費物價指數有最新修訂，以此計算加薪幅度都有變，加薪幅度調低咗0.4個百分點，即係加12%。


按照政府最新嘅加幅建議，下屆政務司長薪金由現時330,565元增升至370,200元；局長薪金由298,115元升至333,900元。按照新加幅，各司局長加薪而引致嘅額外開支每年係1340萬元，比原先預算少40萬元。


泛民一早話唔滿意官員加薪方案，表明拉布，陳健波話好想今星期內搞掂呢個議程，唔好阻住之後撥款申請。波哥話至今收到6個泛民議員按《議事規則》第37A條提出225項臨時動議修正案，其中劉小麗提出91項，而佢會整合呢啲修正案，仲會限制議員發言時間及重複發言，希望能加快開會進度。